Hujjatni agentlik direktori Azim Axmedxojayev va RASN Prezidiumi raisi, «Kurchatov instituti» Milliy tadqiqot markazi prezidenti Mixail Kovalchuk imzoladi.
Tomonlar oʻzaro manfaatli yoʻnalishlar boʻyicha hamkorlikni rivojlantirishga kelishib oldi: atom energetikasi va tinch maqsaddagi yadro texnologiyalarida istiqbolli ilmiy-texnologik yechimlarni tadqiq etish va qoʻllash; zamonaviy tadqiqot infratuzilmasini, shu jumladan «megasayens» sinfidagi qurilmalarni yaratish va ulardan ilmiy foydalanish; ikki mamlakat tashkilotlari oʻrtasida ilmiy va ilmiy-texnik aloqalarni kengaytirish; tajriba va axborot almashish; ekspertlar muloqoti va ilmiy diplomatiyani rivojlantirish. Moliyalashtirish, muddatlar va aniq loyihalar xabarda keltirilmagan.
Kontekst
Kurchatov instituti tadqiqot infratuzilmasidan foydalanish mavzusi ilgari ham koʻtarilgan edi. 2025-yil noyabr oyida «Oʻzatom» rahbari Azim Axmedxojayev V Yosh olimlar kongressida, UzDaily xabariga koʻra, Oʻzbekiston Fanlar akademiyasi, Yadro fizikasi instituti va Fizika-texnika instituti ishtirokida qoʻshma tadqiqotlar boʻyicha yoʻl xaritasini tayyorlayotganini aytgan edi. Uning maqsadi oʻzbekistonlik mutaxassislarning Kurchatov instituti infratuzilmasiga — sinxrotron majmualari, plazma qurilmalari va tadqiqot reaktorlariga — kirishini ta’minlashdir. Bu mamlakatdagi birinchi atom elektr stansiyasi loyihasi bilan bogʻliq: Jizzax viloyatidagi stansiyaning bosh pudratchisi — Rossiyaning «Rosatom» davlat korporatsiyasi muhandislik boʻlinmasi «Atomstroyeksport».