Muammoning koʻlami poytaxt statistikasida ham aks etgan. Toshkent shahrida yilning birinchi yarmida 13 359 ta jinoyat qayd etilgan. Shundan 6989 tasi, ya’ni yarmidan koʻpi axborot texnologiyalari sohasida sodir etilgan. Tergov boʻlinmalari 20 436 ta jinoyat ishi boʻyicha tergov olib borgan. Jinoyatlar oqibatida yetkazilgan zarar 547,7 mlrd soʻmni tashkil etgan. Shundan 388,3 mlrd soʻmi, ya’ni 71 foizi undirilgan.
Kontekst
Kiberjinoyatlarning transchegaraviy xususiyati bunday ishlar boʻyicha tergovni yakunlash nega qiyinligini tushuntiradi: pullar xorijga oʻtkaziladi, jinoyat tashkilotchilari esa Oʻzbekiston tergov organlari vakolat doirasidan tashqarida boʻladi. Shu sababli tergov jarayonida boshqa davlatlardan huquqiy yordam soʻrashga toʻgʻri keladi. Shu bilan birga, firibgarlik sxemalari oddiy telefon orqali ham amalga oshiriladi. Masalan, shu hafta 12 ta Oʻzbekiston banki mijozlariga qaratilgan RedWing Stealer zararli dasturi haqida ma’lum boʻldi. Dastur toʻlovlarni tasdiqlash kodlari mavjud SMS xabarlarni qoʻlga kiritishi mumkin. Moliya sektori bunday hujumlarga qarshi ma’lumot almashish orqali kurashmoqda: Markaziy bankning MISP platformasiga 35 ta bank va 20 ta toʻlov tashkiloti ulangan. Davlatlararo miqyosda bu masala sentabr oyi oxirida muhokama qilingan. MDH davlatlari ichki ishlar vazirlari Dushanbeda uchrashib, huquqni muhofaza qiluvchi organlar oʻrtasida ma’lumot almashish, davlatlararo qidiruv va masofaviy tergov harakatlarini oʻtkazish masalalarini koʻrib chiqqan.
Yana oʻqing