Protokol kelib chiqish qoidalari ilovasining 16-moddasini oʻzgartiradi. Elektron sertifikatlar vakolatli organlar tomonidan berilishi va har bir tomonning milliy qonunchiligiga muvofiq elektron imzo bilan imzolanishi kerak. Hujjat tarif imtiyozlarini kengaytirmaydi: Hindiston 450 ta tovar pozitsiyasi boʻyicha, MERKOSUR esa 452 tasi boʻyicha imtiyozlar beradi. Protokol tomonlar ichki jarayonlarni tugatib, bir-birini xabardor qilgandan keyin kuchga kiradi. Hujjatni Hindiston savdo vazirligi kotibi Rajesh Agarval, Urugvay va Paragvay elchilari imzoladi. Bitimning oʻzi 2004-yil 25-yanvarda imzolangan va 2009-yil 1-iyundan amal qiladi.
Oʻzbekistonda kelib chiqish sertifikatlarini Investitsiyalar, sanoat va savdo vazirligi yoki uning vakolatli organi, shuningdek, Savdo-sanoat palatasi eksportchining deklaratsiya-arizasi asosida beradi. Eksportda sertifikat, agar shartnoma, import qiluvchi mamlakat qonunchiligi yoki xalqaro majburiyatlar buni talab qilsa, yoki eksportchining xohishiga koʻra rasmiylashtiriladi.
Kontekst
Elektron sertifikatlarga oʻtishni tomonlar qoʻshma ma’muriy qoʻmitada muhokama qilgan: gʻoyani 2025-yil 27-noyabrda qoʻllab-quvvatlagan, protokolning oʻzini esa 2026-yil 9-aprelda kelishgan. Qogʻozsiz hujjat aylanishi ShHT kun tartibida ham bor: 17-sentabr kuni vazirlar bojxona muvofiqlashtiruvi va elektron hujjatlar eslatib oʻtilgan rejani kelishdi.