Prezident matbuot kotibi Sherzod Asadov ma’lum qilishicha, islohotning asosiy maqsadi — ta’lim, tarbiya va ilm-fanning yaxlit tizimini zamon talablari asosida tashkil etish, ta’lim sifati va samaradorligini oshirish hamda inson kapitalini rivojlantirish. Ta’limning barcha turlari oʻrtasida oʻzaro uzviylik va bardavomlikni ta’minlash, maktabgacha ta’limdan tortib oliy ta’limgacha barcha bosqichlarni hamda ilmiy faoliyatni qamrab olgan yagona boshqaruv tizimini joriy qilish va tizimning jamoatchilik oldidagi hisobdorligini oshirish koʻzda tutilgan. Norma.uz ma’lumotlariga koʻra, yangi vazirlik maktabgacha ta’limdan oliy va oliy ta’limdan keyingi ta’limgacha, shu jumladan kadrlarni qayta tayyorlash sohasida yagona davlat siyosati uchun mas’ul boʻlib, ikki idoraning huquq, majburiyat va shartnomalari, jumladan xalqaro shartnomalari boʻyicha huquqiy vorisiga aylanadi. Farmon 5-oktabrdan kuchga kirdi.
Asadovning aytishicha, Prezident farmonni imzolar ekan, yangicha yondashuvlarni qoʻllash, bozor talablariga mos ta’limni, raqobatni hamda xususiy sektor ishtirokini rivojlantirish vazifasini qoʻydi. Prezident Administratsiyasi huzurida Inson kapitalini rivojlantirish va uzluksiz ta’lim strategiyasi boʻyicha umummilliy konsepsiyani ishlab chiqadigan maxsus ishchi guruh tashkil etilmoqda. Unga jamoatchilik asosida tadbirkor Zafar Hoshimov rahbarlik qiladi; guruh tarkibiga ta’lim muassasalarini yoʻlga qoʻyish tajribasiga ega tadbirkorlar, soha mutaxassislari, olimlar hamda xalqaro ekspertlar jalb qilinadi.
Shu bilan birga kadrlar almashinuvi ham boʻldi. Ilxom Siradjev Ta’lim va ilm-fan vaziri oʻrinbosari — komplayens va korrupsiyaga qarshi ichki nazorat boʻyicha oʻrinbosari lavozimiga tayinlandi; bundan oldin u Prezident Administratsiyasi Rahbarining ta’limni isloh qilish boʻyicha oʻrinbosari edi. Bu lavozimga Obid Xakimov tayinlandi, u oʻrindoshlik asosida «Yangi Oʻzbekiston» universiteti rektori ham boʻldi; avval u Prezidentning iqtisodiy siyosat boʻyicha maslahatchisi lavozimida ishlagan.
Kontekst
Bundan bir kun oldin, 2-oktabr kuni Prezidentning PQ-358-son qarori bilan Maktabgacha va maktab ta’limi vazirligi tizimidagi 14 ta pedagogika oliy ta’lim muassasasi hamda Ixtisoslashtirilgan ta’lim muassasalari agentligi tizimidagi 3 ta oliy ta’lim muassasasi Oliy ta’lim, fan va innovatsiyalar vazirligiga oʻtkazildi. Vazirlar Mahkamasiga bir hafta ichida yangi vazirlik faoliyatini tashkil etish toʻgʻrisidagi qaror loyihasini taqdim etish, vazirlikning oʻziga esa ikki oy ichida qonunchilikni oʻzgartirish boʻyicha takliflar tayyorlash topshirildi.