Roʻyxatga olish davomida mamlakatdagi barcha faoliyat yuritayotgan iqtisodiy birliklar inventarizatsiyadan oʻtkaziladi, ularning holati va tarmoq mansubligi aniqlanadi, shuningdek, korxona va tashkilotlarning statistik reyestrlari yangilanadi. Milliy statistika qoʻmitasi ta’kidlashicha, respondentlar haqidagi ma’lumotlar faqat statistik maqsadlarda ishlatiladi, natijalar esa faqat umumlashtirilgan holda e’lon qilinadi.
Qaror kuzatilmaydigan iqtisodiyot koʻlami tufayli qabul qilindi: Milliy statistika qoʻmitasi ma’lumotlariga koʻra, 2026-yil yanvar–iyun oylarida uning ulushi yalpi ichki mahsulotning qariyb 23 foizini yoki 245,5 trillion soʻmni, qishloq, oʻrmon va baliq xoʻjaligida esa qoʻshilgan qiymatning 60,5 foizini tashkil etgan. Band boʻlgan 15,2 million kishidan 6,5 millionining daromadi rasmiy hisobda toʻliq aks ettirilmaydi, roʻyxatdan oʻtgan kichik va oʻrta korxonalarning bir qismi amalda ishlamaydi.
Kontekst
Bu bir yil ichidagi ikkinchi yirik roʻyxatga olish: avvalroq 2026-yilda aholi roʻyxatga olingan edi. Roʻyxatga olish 15-oktabrdan 30-noyabrgacha davom etadi: yuridik shaxslar ma’lumotlarni hisobot.stat.uz portalida, oʻzini oʻzi band qilganlar census.stat.uz saytida oʻzlari taqdim etadi, savollarni 1851 qoʻngʻiroq markazi qabul qiladi. Roʻyxatga olish Vazirlar Mahkamasining 9-oktabrdagi 557-sonli qarori bilan tashkil etilgan; Milliy statistika qoʻmitasi natijalarni 2027-yil 1-sentabrgacha e’lon qilishga va’da bermoqda. Prezidentga islohotlar taqdim etilganda aytilgan baholarga koʻra, bu sohada tartib oʻrnatilishi byudjetga oʻnlab trillion soʻm qoʻshimcha daromad keltiradi va istiqbolda soliq yukini kamaytirish imkonini beradi.